ПАЁМИ ПЕШВОИ МИЛЛАТ-ТАВСИЯДИҲАНДАИ РОҲИ НЕКУ РУШНОӢ!
Имсол дар фазои осудаҳолӣ ва суботи кишвар Паёми Асосгузори сулху ваҳдати миллӣ, Пешвои миллат, Президенти Ҷумхурии Тоҷикистон, муҳтарам Эмомалӣ Рахмон ба Маҷлиси Олии Ҷумњурии Тоҷикистон ироа гардид.
Паёми Сарвари давлатро, ки раҳнамои рушди соҳаҳои хоҷагии халқ мебошад, тамоми кормандон ва устодони факултети менеҷмент дар толори Шӯрои олимони Донишгоҳи давлатии Бохтар ба номи Носири Хусрав дастаҷамъона тамошо карданд. Дар Паёми имсолаи худ ба Маҷлиси Олӣ, Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон самтҳои асосии сиёсати дохилию хориҷии мамлакатро барои давраҳои оянда муайян намуда, доир ба пешбурди манфиатбори сиёсати хориҷӣ ва таъмини пешрафти соҳаҳои иқтисоду саноат, энергетика, роҳу нақлиёт, амнияту мудофиа, ҳифзу ҳуқуқу тартибот, тандурустӣ, фарҳанг, илму маориф, ҳифзи иҷтимоии аҳолӣ, ҷавонон, варзиш ва сайёҳӣ вазифаҳои мушаххас ба миён гузоштанд.
Паёми Пешвои миллатро кормандон ва устодони факултет дар маҷлисгоҳи донишгоҳ, бо диќќат ва таваҷҷуҳи хоса тамошо намуданд. Сарвари давлат , Пешвои миллат зимни ироаи Паём қайд намуданд, ки соли 2019 суръати афзоиши воқеии маҷмӯи маҳсулоти дохилӣ 7,5 фоизро ташкил намуд ва ин нишондиҳанда аз ҳисоби зиёд шудани ҳаҷми истеҳсоли маҳсулоти саноатӣ ба андозаи 13,4 фоиз, маҳсулоти кишоварзӣ 7,1 фоиз, гардиши савдо 8 фоиз ва хизматрасониҳои пулакӣ 1,6 фоиз таъмин карда шуд.
Дар ҳафт соли охир рушди иқтисодиёти кишвар ҳамасола ба ҳисоби миёна дар сатҳи 7 фоиз таъмин гардида, маҷмӯи маҳсулоти дохилӣ аз 45,6 миллиард сомонии соли 2015 ба 78 миллиард афзоиш ёфт.
Дар ин давра ҳаҷми умумии даромади буҷет қариб ду баробар афзуда, аз 12 миллиард сомонии соли 2013 ба 23 миллиард сомонӣ баробар шуд.
Тайи солҳои зикршуда даромади пулии аҳолӣ низ беш аз ду баробар ва музди меҳнати миёнаи њар як корманд 2,4 баробар афзоиш пайдо кард.
Сатҳи камбизоатӣ ба 27,5 фоиз паст шуда, дарозумрии миёнаи шаҳрвандон то 75 сол боло рафт.
Ҳамзамон бо ин, тибқи таҳлилҳо дар замони соҳибистиқлолӣ нишондиҳандаи умумии фавт қариб ду баробар, аз ҷумла фавти кӯдакони синни то панҷсола 3,2 баробар кам шудааст.
Дар ин давра аҳолии Тоҷикистон аз панҷуним миллион қариб ба 9,5 миллион нафар расида, беш аз 70 фоиз афзудааст.
Дар баробари ин Пешвои миллат қайд намуданд, ки мо бояд ба рушди бахши хусусӣ таваҷҷуҳи аввалиндараҷа зоҳир карда, заминаи ягонаи ҳуқуқиро барои ҳамаи иштирокчиёни фаъолияти иқтисодӣ, сарфи назар аз шакли моликияти онҳо, муҳайё созем.
Ҷиҳати ҳимояву дастгирии фаъолияти соҳибкорӣ ва ҷалби сармоя аз ҷониби Ҳукумати кишвар дар се соли охир дар соҳаҳои саноати сабук, кишоварзӣ, дорусозӣ, парандапарварӣ, чорводорӣ, сайёҳӣ ва дигар бахшҳои афзалиятнок иловатан 30 намуди имтиёзу сабукиҳо ҷорӣ карда шуданд.
Саноатикунонии босуръат ҳамчун ҳадафи чоруми стратегии кишвар қабул карда шудааст, зеро рушди саноат барои таъмин намудани устувории иқтисодиёт, ташкили ҷойҳои нави корӣ, баланд бардоштани иқтидори содиротии мамлакат ва рақобатнокии он замина мегузорад.
Дар иртибот ба ҳамин Пешвои милла қайд намуданд, ки 7 соли охир ҳаҷми истеҳсоли маҳсулоти саноатӣ қариб 3 баробар (аз 10 миллиард сомонӣ ба 27,5 миллиард сомонӣ) ва ҳиссаи соҳа дар маҷмӯи маҳсулоти дохилии кишвар 5,1 банди фоизӣ (аз 12,6 ба 17,7 фоиз) зиёд гардидааст.
Асосгузори сулњу ваҳдати миллӣ, Пешвои миллат – Президенти Ҷумњурии Тоҷикистон, муҳтарам Эмомалӣ Рањмон таъкид намуданд, ки рушди соҳаи сайёҳӣ самти афзалиятноки сиёсати давлати мо ба ҳисоб рафта, ҷиҳати боз ҳам тараққӣ додани он аз ҷониби Ҳукумати мамлакат вобаста ба пардохти андоз ва боҷҳои гумрукӣ як қатор имтиёзҳо пешбинӣ гардидаанд.
Аллакай, дар зарфи соли якуми эълон гардидани “Солҳои рушди деҳот, сайёҳӣ ва ҳунарҳои мардумӣ” дар деҳоти мамлакат як қатор пешравиҳо ба назар расида, рушди сайёҳӣ ва омӯзиши ҳунарҳои мардумӣ идома ёфта истодааст.
Бо мақсади рақобатпазир гардонидани соҳа дар бозори ҷаҳонии сайёҳӣ моро зарур аст, ки мутахассисони забондон, донандаи фарҳангу таърих ва технологияҳои муосирро омода кунем, кормандони ширкатҳои сайёҳӣ, роҳбаладҳо, тарҷумонҳо ва дигар мутахассисони соҳаро мутобиқ ба талаботи бозори сайёҳӣ ба воя расонем.
Гуфтан ба маврид аст, ки дар факултети менеҷмент соли панҷум аст, ки ихтисоси “Иқтисод ва идораи сайёҳӣ” ташкил гардида, дар доираи ин ихтисос донишҷӯён ба таълиму тарбия фаро гирифта шудаанд ва ҳамзамон дар соли таҳсили 2018-2019 14 нафар донишҷӯ аз рӯи ихтисоси номбурда донишгоњро хатм менамоянд.
Зимни тамошои дастаҷамъона устодони факултети менеҷмент изҳор намуданд, ки Паём ин раҳнамоест, ки бояд ҳар нафар онро сармашқи фаъолияти худ қарор диҳад. Устодон ваъда доданд, ки Паёми Пешвои миллат минбаъд низ ба таври зарурӣ омӯхта шуда, дар амалишавии дастуру супоришҳои таъкидгардида, кӯшиш ба харҷ хоҳем дод.
Шарифхон Саидмуродов,
декани факултети менеҷмент
ДДБ ба номи Носири Хусрав