Дар шароити муосири рушди ҷомеаи Тоҷикистон, масъалаи таъмини баробарҳуқуқии занон ва мардон яке аз самтҳои муҳими сиёсати давлатии иҷтимоиву инсонпарваронаи Ҷумҳурии Тоҷикистон ба шумор меравад. Дар ин раванд нақши Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон хеле назаррас аст.
Аз рӯзҳои аввали Истиқлолияти давлатӣ, Пешвои миллат сиёсати созанда ва дурбинандаро ба роҳ монданд, ки ҳадафи асосии он фароҳам овардани имкониятҳои баробар барои ҳамаи шаҳрвандон, новобаста аз ҷинс, синну сол ва мавқеи иҷтимоӣ мебошад. Маҳз бо талошҳои пайгиронаи ӯ, ҳуҷҷатҳои муҳими меъёрӣ-қонунӣ барои ҳимоя ва таъмини ҳуқуқҳои занон қабул гардиданд, аз ҷумла:
Қонуни Ҷумҳурии Тоҷикистон «Дар бораи кафолатҳои давлатии баробарҳуқуқии мардону занон ва баробар имкониятҳои амалӣ намудани онҳо» (солҳои 2005, бо тағйиротҳои минбаъда);
Барномаи миллии «Оила» ва «Стратегияи миллии фаъолгардонии нақши занон дар Ҷумҳурии Тоҷикистон»;
Барномаҳои давлатӣ оид ба баланд бардоштани нақши занон дар ҷомеа ва дастгирии модарону кӯдакон.
Пешвои миллат борҳо таъкид кардаанд, ки бе иштироки фаъолонаи занон ҷомеа пешрафт карда наметавонад. Дар суханрониҳояшон муҳтарам Эмомалӣ Раҳмон иброз намудаанд: «Занон қувваи бузурги созандаанд ва нақши онҳо дар рушду нумӯи давлату миллат беназир аст».
Дар даврони Истиқлолият шумораи занон дар сохторҳои роҳбарикунанда, мақомоти давлатӣ, илму маориф, тандурустӣ ва бахшҳои иҷтимоӣ ба таври назаррас афзудааст. Имрӯз садҳо бонувони тоҷик дар мақомҳои вазир, муовини вазир, раиси ноҳия, вакили мардумӣ, ректор, олим ва соҳибкор фаъолият доранд. Ин ҳама натиҷаи сиёсати хирадмандонаи Пешвои миллат аст, ки ҳамеша барои таҳкими мақому манзалати занон дар ҷомеа талош меварзанд.
Ғайр аз ин, тавассути барномаҳои давлатӣ шароити мусоид барои таҳсил, соҳибкорӣ ва рушди худшиносии занон фароҳам оварда шудааст. Ташкили Марказҳои дастгирии оила, курсҳои бозомӯзӣ ва барномаҳои грантӣ барои бонувон аз дастовардҳои бузурги сиёсати Пешвои миллат ба ҳисоб мераванд.
Пешвои миллат муҳтарам Эмомалӣ Раҳмон ҳамчун ҳомии баробарҳуқуқии занон ва мардон дар Тоҷикистон сиёсати устувори гендериро ба роҳ монда, бо иқдомҳои созандаашон барои пешрафти воқеии занон дар тамоми соҳаҳо заминаи устувор гузоштанд. Дар натиҷа, имрӯз занони тоҷик ҳамчун шарики баробарҳуқуқи мардон дар рушди иҷтимоиву иқтисодии кишвар саҳми назаррас мегузоранд.
Зувайдуллозода Ганҷина,
номзади илмҳои иқтисодӣ, дотсент,
Мудири кафедраи таҳлили иқтисодӣ ва аудит
