Тавре қаблан иттилоъ додем, Ситоди ҷумҳуриявӣ оид ба пурзӯр намудани чораҳои зиддиэпидемиявӣ барои пешгирӣ аз интиқолу паҳншавии бемории сироятии COVID–19 дар Ҷумҳурии Тоҷикистон вобаста ба хуруҷи мавҷи дуюми ин беморӣ қарор қабул намуд, ки гузаронидани ҳама гуна чорабиниҳои тантанавӣ, аз ҷумла гузоштани арчаи солинавӣ, баргузории чорабиниҳои фарҳангии оммавӣ, нишастҳои ҷашнӣ ва шабнишиниҳо ба муносибати Соли нави мелодии 2021 дар қаламрави мамлакат манъ карда шудааст. Инчунин сайру гашти мардум дар боғҳои фарҳангу фароғат, гулгашту хиёбонҳо ва дигар ҷойҳои ҷамъиятӣ танҳо бо дарназардошти риояи ҳатмии қоидаҳои гигиенаи шахсиву ҷамъиятӣ, истифодаи ҳатмии ниқобҳои муҳофизатӣ ва риояи қатъии фосилаи иҷтимоӣ дар масофаи байниҳамдигарии аз 1,5 то 2 метр иҷозат дода мешавад.
Тавре аз Вазорати фарҳанг ба АМИТ «Ховар» хабар доданд, ҳунармандони Сирк ва театрҳо барномаҳои фарҳанги худро баъд аз 2 январи соли нав бо риояҳои қойидаҳои беҳдоштӣ пешкаши тамошобинон менамоянд.
Мавриди зикр аст, ки аз замони собиқ Иттиҳоди Шӯравӣ то имрӯз бори аввал аст, ки дар шаҳру ноҳияҳои Тоҷикистон ба муносибати Соли нави мелодӣ арчаҳои солинавӣ гузошта намешаванд ва баргузории ҳамагуна чорабиниҳои фарҳангӣ ва шабнишиниҳо манъ гардидаанд. Тоҷикистониён мисли аксар сокинони сайёра Соли нави мелодии 2021 –ро дар доираи оила таҷлил менамоянд.
Бояд ёдовар шуд, ки соли 2019 Арчаи сабзу зебое, ки бо 6 ҳазор бозича ва 85 ҳазор ороишот дар майдони Исмоили Сомонии шаҳри Душанбе зеб дода шуда буд, ба рейтинги даҳгонаи баландтарин ва асоситарин арчаҳои солинавии пойтахтҳои кишварҳои Иттиҳоди Давлатҳои Мустақил Ашқобод (40 метр), Ереван (37 м), Тошканд (36 м), Боку (34 м), Минск (30 м), Душанбе (29 м), Москва (27 м), Бишкек (27 м), Нур-Султон (25 м) ва Кишинёв (20 м) шомил шуд. Баландии арчаи асосии солинавии Тоҷикистон 29 метрро ташкил медод.
Фолклоршиноси тоҷик, номзади илми филология Дилшод Раҳимӣ иброз дошт, ки «вазъияти имрӯз ба амаломада тақозо менамояд мо барои солимии худ ва аҳли хонавода, дар маҷъмӯ баҳри солимии ҷомеа ва миллат қарори Ситоди ҷумҳуриявӣ оид ба пурзӯр намудани чораҳои зиддиэпидемиявӣ барои пешгирӣ аз интиқолу паҳншавии бемории сироятии COVID–19 дар Ҷумҳурии Тоҷикистонро иҷро намуда, аз чорабиниҳои оммавӣ, ки манбаи сироят буда метавонанд, дурӣ ҷуста, Соли нави мелодиро бо аҳли хонавода, бо ибрози муҳаббат, тақдим туҳфа ба онҳо таҷлил намоем, ки он хотирмонтар хоҳад буд».
АМИТ «Ховар»